१६ बैशाख, काठमाडौं । नेपाल प्रहरी नयाँ नेतृत्व पाउने संघारमा छ । तीन दिनपछि वर्तमान प्रहरी प्रमुख प्रकाश अर्यालको कार्यकाल सकिँदैछ र सर्वेन्द्र खनाल, रमेश खरेल, पुस्कर कार्की, उत्तम कार्कीहरु मध्येबाट एक महानिरीक्षक बन्नेछन् ।

तर, अहिले प्रहरी बृत्तमा नयाँ आईजीपी भन्दा साढे ३३ केजी सुनकाण्डको चासो र चर्चा बढी छ ।

यसमा प्रहरीको माथिल्लो दर्जाकै अधिकारीहरु समेत मुछिएका छन्, जसको थप खुलासा हुन बाँकी छ ।

के हो साढे ३३ किलो सुनकाण्ड ?

माघ अन्तिम साता यूएईबाट त्रिभुवन अन्तर्राष्ट्रिय विमास्थल हुँदै आएको तस्करीको साढे ३३ केजी सुन सम्बन्धित व्यक्तिसम्म नपुगी गायब भएको गाइगुइ चलेको थियो । तर, भरिया उर्लाबारीका सनम शाक्यको हत्यासँगै सुन हराएको पुष्टि भयो ।

घटनालाई लुकाउन प्रहरीले भूमिका खेलेको आरोप छ । यसबारे छानविनका क्रममा महानगरीय अपराध अनुसन्धान महाशाखाका प्रमख एसएसपी दिवेश लोहोनी, डीएसपी प्रजित केसी र सई बालकृष्ण सञ्जेल हेडक्वाटर तानिएका छन् ।

घटनाको अनुसन्धान गर्न गृहमन्त्रालयले सह-सचिव ईश्वर पौडेल नेतृत्वको छानबिन समिति बनाएको छ भने प्रहरी प्रधान कार्यालयले प्रहरी नायब महानिरीक्षक (डीआईजी) पुष्कलराज रेग्मीको नेतृत्वको समिति बनाएको थियो ।

भारतको भगौडा आर्मीदेखि सुन तस्करीसम्म

प्रहरी वृत्तमै हलचल मच्चाएका साढे ३३ केजी सुनका मालिक हुन्, मोरङ, उर्लाबारीका चुडामणि उप्रेती । ‘गोरे’ उपनामले चिनिने उनलाई ‘गोल्ड डन’ पनि भन्ने गरिन्छ ।

प्रहरी उच्च अधिकारीहरुसँग हिमचिमबाट फाइदा उठाउँदै गोरेले सुन तस्करी गर्दै आएका थिए । यसअघि पनि उनको नाम तस्करीसँग नजोडिएको होइन तर, बच्दै आएका थिए । यो पटक सनमको हत्याभएपछि उनी अनुसन्धानको घेरामा छन् ।

उनी मध्यम वर्गीय परिवारमा हुर्किएका थिए । नेपाल प्रहरीका पूर्व प्रहरी सहायक निरीक्षकका छोरा उप्रेतीले भारतीय सेनामा जागिर खाने प्रयास पनि गरेको थिए । तर, त्यहाँ पुगेर सेनाको तालिम लिएको केही समयमै उनी भागेका थिए ।

त्यहाँबाट भागेर उनी दूबई पुगेका थिए । त्यहाँ पनि उनले दूबई प्रहरीमा पनि जागिर खाए । स्वदेशमा छँदा मोरङ-११ फुटबल क्लबमा समेत आबद्ध उनको जीवनमा दूबई गएपछि भने एकाएक परिवर्तन आएको थियो ।

उनी निकट उर्लाबारीका एक व्यवसायी भन्छन्, ‘दूबई गएपछि एकाएक आर्थिक हैसियत फेरियो ।’

दूबई प्रहरीमा काम गर्दा नै उनले सुन तस्करी उपायको बारेमा जानकारी लिएको देखिन्छ । त्यसपछि दूबई प्रहरीको जागिर छाडेर तस्करीलाई धन्दा बनाएका थिए ।

जसलाई सफल बनाउन उनले प्रहरी अधिकारीसँग सम्बन्ध बढाए । दूबईमा प्रहरीको जागिर छाडेपछि निरन्तर नेपाल आउजाउ गर्न थाले ।

नेपालमा रहेका वेला उर्लाबारीका प्रतिष्ठित भनिएकाहरुसँग ‘मन्डे होटल’ मा दिनहुँ पार्टी चल्ने गरेको थियो । ‘उसले हाम्रो लागि प्रायः एउटा कोठा रिजर्भ गर्ने गरेको थियो’, स्रोतले भनेको छ, ‘उनले कतिपयलाई स्कोर्पियो गाडीमा दिएका थिए ।’

देखिने गरी उनको उर्लाबारीमा डेढ विगा जग्गा र दुई तले पक्की घर बनाएका थिए । काठमाडौंको गुह्येश्वरीमा पनि आलिसान बंगला ठड्याएका उनले बानेश्वरमा दुई वटा कोठा भाडामा लिएर सुन स्टोर गर्ने गोदाम बनाएका थिए ।

हाल उनका भाइ र श्रीमति दुवै यूएईमा छन् । उनका परिवारका अधिकांश सदस्य उर्लाबारीबाट हिँडिसकेका छन् । उनको घरमा भाडामा बसेकाहरु घटना सार्वजनिक भएलगत्तै घर छोडेर निस्किएका छन् । गोरेसँगै सम्बन्ध भएकाहरु तैं चुप मैं चुप भएका छन् । गोरे भने भारतमा लुकेको प्रहरीको आशंका छ ।

पण्डितलाई सुनको औँठी, नेतालाई स्कोर्पियो !

सुन तस्करीबाट रातारात करोडपती भएका उनले स्थानीय तह र आम चुनावका बेला राजनीतिक दलका उम्मेदवारहरुलाई सहयोग समेत गरेको पाइएको छ । स्थानीय केही नेतालाई उनले स्कोर्पियो गाडी किनिदिएका थिए ।

लामो कपाल पालेर चुल्ठो बाध्ने गरेका उनले केही समयअघि स्थानीय मोहन काफ्लेको घरमा पुराण लागेका वेला पुरन भनिने पण्डितलाई सुनको औंठी दिएका थिए । स्थानीय भजन कीर्तन मण्डलीलाई दिनको ३० हजारको दरले रकम बाँडे ।

घटना हुनु केही दिनअघि उर्लाबारीमा भएको मेयर कप फुटबलमा समेत उनी सहभागी भएका थिए । उर्लाबारी-७ को प्रतिनिधित्व गर्दै खेलेका उनी बारे त्यसवेला कसैले चाल पाएनन् । खेलमा उनको टोली उपविजेता बनेको थियो ।

०५७ सालमा एसएलसी दिएका उनले उर्लाबारी क्याम्पसबाट आईए पढ्दा पढ्दै छोडेका थिए ।

सुन तस्करीमा प्रयोग हुने भरियालाई सामाजिक सञ्जाल प्रयोग गर्न निषेध गर्ने गरेको प्रहरी अनुसन्धानका क्रममा खुलेको छ । कतिसम्म भने सम्बन्धित ठाउँसम्म सुन डेलिभरी नहुञ्जेलसम्म मोबाइल पनि चलाउन दिँदैनथे ।

प्रहरीकै संलग्नतामा गोरे भागे ?

प्रहरी हिमचिमका कारण आफ्नो अपराध धन्दा लुकाउन सफल गोरे सनम हत्यामा फसे । सुन गायब भएपछि यातना दिने क्रममा सनमको मृत्यु भएको प्रहरी अनुसन्धानबाट खुलेको छ । तर, यो घटनाका प्रहरी पनि आफैं फस्न पुग्यो ।

१९ फागुनमा महानगरीय अपराध अनुसन्धान महाशाखाले एउटा सूचना पठायो, ‘अपराध महाशाखा र मोरङ प्रहरीको टोलीले विराटनगर-३, पोखरिया कन्यामार्गमा बा १२ च ५९६३ नम्बरको स्कर्पिओ गाडीको डिकीमा म्याट्रेस, त्रिपालले बेरेको अवस्थामा एक युवकको शव बरामद गरेको छ ।’

साँझ अपडेट दियो- तस्करीको सुनका कारण अपहरण गरी सिराहाको दक्षिण भेगमा सनमको हत्या भयो ।

त्यति नै वेला प्रदेश १ को संघीय प्रहरी कार्यालय र जिल्ला प्रहरी कार्यालय मोरङले पनि पत्रकार सम्मेलन गरेर सार्वजनिक गर्ने तयारी गरिरहेको थियो । भोलिपल्ट २० गते मोरङमा पत्रकार त भयो तर, घटना विवरण फरक आयो ।

महाशाखाले सनमको हत्या सिराहमा भएको बताइरहँदा मोरङमा आयोजित पत्रकार सम्मेलनमा उर्लाबारी-१, सोल्टी खोलामा उनको हत्या भएको बताएको थियो ।

घटनामा संलग्न भएको आरोपमा त्यसवेलै काभ्रेका ३२ वर्षीय टेकराज मल्ल, उर्लाबारीकै ३३ वर्षीय कृष्ण भनिने नरेन्द्र कार्की र ३७ वर्षीय मोहन काफ्ले पक्राउ परेका थिए । यद्यपि, अनुुसन्धानका क्रममा उनीहरु आफैं पनि तस्करीमा प्रयोग भएका भरिया भएको खुलेको छ ।

घटनामा गम्भीरतापूर्वक अनुसन्धान नगरेको भन्दै प्रहरी प्रधान कार्यालयमा उजुरी परेपछि अनुसन्धान समिति गठन भयो । घटनामा प्रहरी अधिकारीकै संलग्नता रहेको भेटिएपछि गृहमन्त्री रामबहादुर थापा ‘बादल’ ले पनि चासो देखाएका थिए । र, गृहमन्त्रालयले छुट्टै छानबनि समिति गठन गरेको थियो ।

छानबिन समिति गरेको अनुसन्धान समितिले भने सनम शाक्यको शव १९ फागुनमा धरानको भानु चोकबाट बरामद गरेको तथ्य फेला पारेको स्रोतको भनाइ छ । सुन मालिक गोरेलाई भगाउन बिराटनगरबाट बरामद गरेको नाटक गरिएको बताइन्छ ।

११ जना समातिए

घटनाको अनुसन्धान गर्न गठित समितिले अहिलेसम्म ११ जनालाई नियन्त्रणमा लिएको छ ।

पक्राउ पर्नेमा भुजुङ गुरुङ, थाई एयरवेजका कर्मचारी बालकृष्ण श्रेष्ठ लगायत छन् । श्रेष्ठले नै एयरपोर्टबाट सुन भित्र्याउन सहयोग गरेको अनुसन्धान समिति स्रोतको भनाइ छ ।

यसअघि शुक्रबार प्रहरीले गोरे सुन राख्ने गरेको बानेश्वरस्थित घरमा छापा मारेको थियो । त्यहाँबाट प्रहरीले सुनको विस्कुट बोक्न प्रयोग हुने वेस्टकोट र पैसा गन्ने मेसिन भेट्टाएको छ । अनलाईन खबरबाट साभार

Comments

comments