काभ्रे । पनौती नगरपालिका–७ मल्पीकी ५८ वर्षीया तिलकुमारी देउजाको हत्यामा संलग्न रहेका दुई युवालाई प्रहरीले सार्वजनिक गरेको छ ।
उनीहरुलाई जिल्ला प्रहरी कार्यालय काभ्रेले बुधवार पत्रकार सम्मेलन गरी सार्वजनिक गरेको हो । पत्रकार सम्मेलनमा जिल्ला प्रहरी कार्यालय काभ्रेका प्रमुख एसपी रविराज खड्काले दिएको जानकारी अनुसार सिन्धुपाल्चोकका सुनखानी गाउँपालिका सन्तोष थामी र खाँडादेबी गाउँपालिका–७, रामेछापका राजबहादुर थामीले लुटपाटपछि हत्या गरेका थिए ।
मदिरा सेवन पछि तिलकुमारीको हत्या
प्रहरीका अनुसार राजबहादुर थामी तिलकुमारीको घरमा डेरा गरी बस्थे । तिलकुमारीको पसलमा सन्तोष एक दिन खाजा खाना आएका थिए । राजबहादुर र सन्तोषले लुटपाट गर्ने योजना बनाए । असार २१ गते मृतक तिलकुमारीको पसलमा सन्तोष, राजबहादुरसँगै बसेर राती अबेरसम्म घरेलु मदिरा सेवन गरेका थिए ।
रात धेरै परेकोले मृतक तिलक कुमारी देउजाले घरको माथिल्लो तलामा सुत्न जान्छु भनि गएको बेला उनीहरु दुईजनाले हत्या गरेको योजना बनाएको प्रहरीको अनुसन्धानमा खुलेको छ । त्यसपछि राजबहादुर र सन्तोष दुवैजनाले देउजासँग धेरै सम्पत्ति भएकोले सम्पत्ति दुवैजनाले बाँडी लिने योजनाका साथ तिलकुमारी सुत्ने कोठामा पुगेका थिए । मदिराले मातिसकेको तिलक कुमारीको एकजनाले घाँटीमा र एकजनाले खुट्टामा थिचेर हत्या गरेको प्रहरीको अनुसन्धामा खुलेको एसपी खड्काले पत्रकार सम्मेलनमा जानकारी दिए ।
यसरी पक्राउ परेको थियो हत्यारा
नियमित मापसे चेकिङका लागि ट्राफिक प्रहरी साँगामा परिचालन भएको थियो । प्रहरीका अनुसार अरनिको राजमार्गको बनेपा तर्फबाट एउटा बाइक अत्याधिक गतिमा साँगातर्फ आयो । बनेपातर्फ आएको बाइक प्रहरीले चेकिङका लागि रोक्यो ।
पछाडि बसेका खाडादेबी गाउँपालिका २६ वर्षीय राजबहादुर थामी बाइकबाट झरिहाले । बाइक चालक सुनकोसी गाउँपालिका–७ रामेछापकै सन्तोष थामीले जवरजस्ती बाइक लछार–पछार पार्दै भागे ।
बाइकमा रहेका राजबहादुरलाई प्रहरीले इलाका प्रहरी कार्यालय बनेपामा ल्याएर जेकजाँच गर्ने क्रममा उनका साथबाट सुनको सिक्री, झुम्का, पुराना नोट, तीन किलो जति सिक्का पैसा, तीनवटा मोवाइल भेटियो ।
सोही आधारमा प्रहरीले मल्पी पुगेर तिलकुमारीको घरमा हेर्दा, उनीहरुले लुटेर, हत्या गरी भागेको खुलेको थियो । प्रहरीले नियमित चेकिङ गर्दा शंका लागेपछि थप बुझ्न खोज्दा सन्तोष भागेपछि राजबहादुरसँग लिएको बयान र उनीहरुको साथबाट तिलकुमारीको नागरिकता भेटिएको पत्रकार सम्मेलनमा जानकारी गराए ।
प्रहरीले मापसे मात्रै होइन, शरीर पनि सर्च गर्दा थाहा हत्यारा पत्ता लागेको प्रहरीले जानकारी दिए ।
