काभ्रेका स्वर्ण पदक बिजेता माेक्तान सम्मानित

भक्तपुर– भुटानको थिम्पुमा भएको आठौं दक्षिण एसियाली कराँते प्रतियोगितामा स्वर्ण पदक दिलाउन सफल काभ्रे महाभारत गाउँपालिका–२ कुपिन्टरका सागर मोक्तानको जन्मदिनको अवसरमा बधाई तथा शुभकामना ज्ञापन कार्यक्रम सम्पन्न भएको छ ।

राष्ट्रिय खेलाडी सागर मोक्तान १७ वर्ष पुगेको अवसरमा बिहिबार भक्तपुरको निकोसेर पार्टी प्यालेसमा मोक्तान परिवारद्धारा आयोजित कार्यक्रम भव्यतापूर्वक सम्पन्न भएको हो । कार्यक्रममा विभिन्न राजनीतिक दलका शीर्ष नेतृत्व,समाजसेवी, बुद्धिजिवी, आफ्न्त, इष्टमित्र, आफन्त एवं शुभचिन्तकहरुको बाक्लो उपस्थिति थियो ।

कार्यक्रमलाई सम्बोधन गर्दै पूर्वमन्त्री एवं प्रतिनिधिसभा सदस्य सुर्यमान दोङ लालध्वजले सागर मोक्तान सिंगो देशको सम्पति भएको बताए । ‘सागर भाईले देशको प्रतिष्ठा बढाएका छन्, कराँतेमा स्वर्ण पदक दिलाएर सागरले देशको उचाईलाई संसारभर चिनाएका छन्’ उनले भने, ‘सागर मोक्तान भाईको थप प्रगती र विकासका निम्ति मैले गर्नुपर्ने साथ र सहयोगमा कुनै कमी आउन दिने छैन ।’

त्यसैगरी बागमती प्रदेश सरकारका पूर्वमन्त्री एवं प्रदेशसभा सदस्य तीर्थ लामाले सागर मोक्तानसँग खेलाडीमा हुनुपर्ने गुणहरु भएको बताए । उनले भने, ‘असल खेलाडीमा हुनुपर्ने सबै गुण सागर भाईमा छ, मेरो र पार्टीको तर्फबाट गर्नुपर्ने सहयोगमा कुनै कमी आउन दिने छैन’ उनले भने । यस्तै नेकपा एमाले काभ्रे जिल्ला कमिटिका अध्यक्ष राजन भुर्तेलले महाभारतलाई संसारभर चिनाउनका लागि सागर मोक्तानले खेलेको भूमिका अतुलनीय रहेको भन्दै प्रशंसा गरे ।

कार्यक्रममा सागरको जन्मदिनको केक काटिएको थियो भने आफन्तजनले टिका लगाएर उनलाई शुभकामना र आशीर्वाद दिएका थिए । उपस्थित अतिथि एवं सहभागीहरुले उनलाई थप प्रगतीको कामनासहित शुभेच्छा व्यक्त गरेका थिए । कार्यक्रममा मोक्तान वंश अनुसन्धान समाज जिल्ला कार्यसमिति काभ्रे, म्हाबर यम्बु योन्जन परिवार कोष, सेवा फिल्मस् प्रा.लि. लगायत विभिन्न पार्टी तथा संघसंस्थाहरुले समान पत्रद्धारा सम्मान गरेका थिए ।