हेटौंडा – तामाङ चलचित्र उद्योगमा नयाँ आयाम थप्ने प्रयाससहित निर्माण गरिएको प्रेमकथानक चलचित्र ‘ए ङाला ह्राङ्बा माया’को विशेष प्रिमियर आगामी पुष २० गते हेटौंडाको ओम्याक्स हलमा हुने भएको छ। मुनसन सुपर स्टार मुभिज प्रालिको ब्यानरमा निर्माण गरिएको यो चलचित्र तामाङ समुदायको संस्कृति, प्रेम, र सामाजिक परिवेशलाई चित्रित गर्ने उद्देश्यले तयार पारिएको हो।
शनिबार आयोजित पत्रकार सम्मेलनमा चलचित्र टिमले प्रिमियर शोको तयारी पूरा भएको जानकारी दियो। कार्यक्रममा चलचित्रको ट्रेलर पनि सार्वजनिक गरियो, जसले दर्शकमा सकारात्मक प्रतिक्रिया प्राप्त गरेको छ।
‘ए ङाला ह्राङ्बा माया’ तामाङ समुदायको मौलिक कथा बोकेको चलचित्र हो, जसले प्रेम र सम्बन्धका उतारचढावहरूलाई भावनात्मक रूपमा प्रस्तुत गरेको छ। निर्देशक हुत्त सन्जय लामाले चलचित्रको छायांकन मकवानपुरको इन्द्रसरोवर क्षेत्रको प्राकृतिक सुन्दरता र सांस्कृतिक सम्पदालाई समेटेर गरिएको बताए।
चलचित्रको निर्माण लागत करिब २४ लाख रुपैयाँ रहेको छ। निर्माता लोसाङ लामा र इकेश लामाको संयुक्त प्रयासमा तयार भएको यो चलचित्रमा सहनिर्देशकको भूमिका विश्वजंग माझीले निर्वाह गरेका छन्।
चलचित्रमा तामाङ चलचित्र क्षेत्रका प्रतिभाशाली कलाकारहरूको सहभागिता रहेको छ।
हुत्त सन्जय लामा निर्देशक मुख्य नायक ,चर्चित नायिका सुनिता लुङ्बा, नवनायक हेम कुमार तितुङ, र तारा थोकर प्रमुख पात्रका रुपमा देख्न सकिन्छ ।
प्रज्मि बोम्जन, हिरा बहादुर मोक्तान, मायादेवी मोक्तान, भुइसाल लामा, मिलन लामा, उर्गेन लामा, र कुमार लामा सहायक भूमिकामा, जसले चलचित्रलाई थप जीवन्त बनाउने भूमिका खेलेका छन्।
यी कलाकारहरूको उत्कृष्ट अभिनयले चलचित्रलाई उत्कृष्ट बनाउनेमा निर्देशक लामाले विश्वास व्यक्त गरे।
प्रिमियर घोषणाका लागि आयोजित पत्रकार सम्मेलनमा तामाङ पत्रकार संघ बागमती प्रदेशका ज्ञानेन्द्र लामा, चलचित्र पत्रकार संघ मकवानपुरका उपाध्यक्ष श्रीराम अर्जुन दाहाल, तामाङ कलाकार संघ मकवानपुरका अध्यक्ष धिरेन लामा, नेपाल तामाङ संस्कृति घेदुङ मकवानपुरका अध्यक्ष अजय गोले लगायत अन्य थुप्रै विशिष्ट व्यक्तिहरू उपस्थित थिए।
त्यस्तै, नेपाल पत्रकार महासंघ मकवानपुरका सहसचिव सन्नु रिजाल, सदस्य सरोज पौडेल, र चलचित्र टिमका नायिका सुनिता लुङ्बा, नायक हेमकुमार तितुङ, तारा थोकर, माया डोल्मा लामा, मनिका सिन्तान, राजकुमार तामाङ, र हिरा बहादुर मुक्तानको समेत विशेष उपस्थिति थियो।
‘ए ङाला ह्राङ्बा माया’ले प्रेमकथा र तामाङ समुदायको सांस्कृतिक विशेषतालाई प्रभावकारी रूपमा प्रस्तुत गर्ने उद्देश्य राखेको छ। चलचित्रमा प्रेमका भावनात्मक पक्षहरूलाई सांस्कृतिक पृष्ठभूमिसँग जोडेर दर्शकको मन छुने प्रयास गरिएको छ।
हेटौंडाको भव्य प्रिमियरपछि यो चलचित्र देशका अन्य प्रमुख स्थानहरूमा प्रदर्शन गर्ने योजना रहेको छ। निर्देशक लामाले चलचित्रले तामाङ समुदायको पहिचान मात्र नभई नेपाली चलचित्र उद्योगमा विविधता थप्ने विश्वास व्यक्त गरे।
‘ए ङाला ह्राङ्बा माया’ नेपाली चलचित्र क्षेत्रका लागि तामाङ समुदायको कला र संस्कृतिको विशेष प्रतिनिधित्व गर्ने कोशेढुंगा सावित हुने अपेक्षा गरिएको छ।
ए ङाला ह्राङ्बा माया’को प्रिमियर हेटौंडामा भव्य रूपमा सफल भएपछि, देशका विभिन्न स्थानमा समेत प्रदर्शन गरिने चलचित्र टिमले जानकारी दिएको छ।
