धुलिखेल– धुलिखेल नगरपालिकाको ३९औँ स्थापना दिवसको अवसरमा चलचित्र विकास बोर्ड र धुलिखेल नगरपालिकाबिच एक हजार तीन सय रोपनी जग्गा हस्तान्तरणसम्बन्धी प्रारम्भिक सम्झौता भएको छ।
नगरपालिकाका मेयर अशोककुमार ब्याञ्जू श्रेष्ठ र चलचित्र विकास बोर्डका अध्यक्ष दिनेश डिसीबिच भएको सम्झौतामा पूर्वसञ्चारमन्त्री गोकुल बाँस्कोटा, उपमेयर नीराजन जंगम, चलचित्र विकास बोर्ड सदस्य केवल पीडि तथा चलचित्र कलाकार संघका पूर्वअध्यक्ष रवीन्द्र खड्का आदिको उपस्थिति रहेको थियो ।
अध्यक्ष डिसीले यस अवसरमा बोल्दै धुलिखेलमा चलचित्र विकास बोर्डको आउटडोर स्टुडियो निर्माण गर्ने योजना सार्वजनिक गरे। उनले भने, ‘यो स्टुडियो नेपाली चलचित्र उद्योगका लागि नयाँ माइलस्टोन साबित हुनेछ। यहाँ प्राकृतिक सुन्दरता र अत्याधुनिक प्रविधि संयोजन गरेर चलचित्र निर्माणलाई सहज बनाउने परिकल्पना रहेको छ।’
नगरपालिकाका मेयर अशोककुमार ब्याञ्जू श्रेष्ठले चलचित्र क्षेत्रको विकासका लागि धुलिखेल नगरपालिकाले हरतरहले साथ दिने बताउँदै भने, ‘यो परियोजनाले नेपाललाई अन्तर्राष्ट्रिय फिल्म गन्तव्यका रूपमा उभ्याउनेछ। पर्यटन प्रवर्द्धनसँगै स्थानीय रोजगारी सिर्जना गर्ने महत्त्वपूर्ण अवसर पनि प्रदान गर्नेछ।’ नेपालमा मात्र नभई अन्तर्राष्ट्रिय चलचित्र निर्माता तथा निर्देशकहरूलाई समेत आकर्षित गर्ने लक्ष्यसहित परियोजना अगाडि बढाइने बोर्डले जनाएको छ।
समाचार पढेपछि प्रतिक्रिया लेख्न नभुल्नुहाेला ।
