खानीखोला– काभ्रे जिल्लाको खानीखोला गाउँपालिका वडा नं. ५ का मुन्द्रे भनिने विकास भुजेलले आफ्नै आमामाथि धारिलो हतियार प्रहार गरेका छन् । आइतबार साँझ ५ बजेतिर भुजेलले ज्यान मार्ने उद्देश्यका साथ आमाथि धारिलो हतियार प्रहार (चुपी) प्रहार गरेका हुन् ।
चुपी प्रहारबाट भुजेलका आमा गम्भीर घाइते भएकी छिन् । उनको टाउकोमा गहिरो चोट लागेको छ । मदिरा सेवन गरी आएका उनले अचानक आफ्नै आमालाई धारिलो हतियार चुपीले हानेका हुन् । उनको अहिले स्थानीय ताल्ढुंगा स्वास्थ्य चौकीमा उपचार भइरहेको छ ।
साथै भुजेलले उनका आमापछि खानीखोला गाउँ प्रहरी जवान पाल्साङ स्याङतानमाथि पनि धारिलो हतियार (चुपी) प्रहार गरेका छन् । आमालाई धमाधम चुपी प्रहार गरी गम्भीर घाइते बनेपछि गाउँपालिकाको कार्यालय परिसरमा आई एक्कासी स्थानीय भुजेलले गाउँ प्रहरी जवान स्याङतानमाथि चुपी प्रहार गरी घाइते बनाएको जिल्ला प्रहरी कार्यालय काभ्रेका प्रहरी निरीक्षक दिनेश बहादुर कुँवरले जानकारी दिए ।
गाउँपालिकाको कार्यालय परिसरमा मदिरा सेवन गरी आएका भुजेलले गाउँ प्रहरी जवान स्याङतानमाथि चुपी प्रहार गरेका हुन् । चुपी प्रहारबाट प्रहरी जवान स्याङतान गम्भीर घाइते बनेका छन् । उनको शरीरमा गहिरो चोट लागेको स्थानीयले बताएका छन् ।
प्रहरी निरीक्षक कुँवरका अनुसार भुजेलले धारिलो हतियारबाट घाइते बनाएका उनका आमा र गाउँ प्रहरी जवान स्याङतानको स्थानीय स्वास्थ्य चौकीमा उपचार भइरहेको छ । चुपी प्रहार गरेका भुजेललाई प्रहरीले नियन्त्रणमा लिइसकेको प्रहरी निरीक्षक कुवँरले बताए । भुजेललाई अहिले प्रहरी चौकी ताल्ढुंगाको टोलीले जिल्ला प्रहरी कार्यालयमा ल्याउँदैछ ।
समाचार पढेपछि प्रतिक्रिया लेख्न नभुल्नुहाेला ।
