काठमाडौं — नेपाल विद्युत प्राधिकरणका पूर्व कार्यकारी निर्देशक तथा उज्यालो नेपालको प्रतीक बन्न सफल कुलमान घिसिङको बर्खास्तीविरुद्ध “कुलमान घिसिङ पुनर्वहाली संयुक्त आन्दोलन परिचालन समिति, नेपाल”ले २०८१ साल चैत २४ गते, आइतबारका दिन दिउँसो १ बजे माईतीघर मण्डलमा बृहत् विरोध प्रदर्शन कार्यक्रमको आयोजना गर्ने भएको छ।
कुलमान घिसिङजस्ता कुशल, दूरदर्शी र भ्रष्टाचारविरुद्ध स्पष्ट दृष्टिकोण राख्ने नेतृत्वकर्तालाई अपमानजनक र पूर्वाग्रही ढंगले पदबाट हटाइएकोमा गहिरो असन्तुष्टि प्रकट गर्दै यो आन्दोलनको आयोजना गरिएको हो।
कुलमान घिसिङको कार्यकालमा मुलुकले लोडसेडिङको अन्त्य, विद्युत चुहावट नियन्त्रण, आयातमा निर्भरता घटाउने, आन्तरिक उत्पादन बढाउनेजस्ता महत्वपूर्ण उपलब्धिहरू हासिल गरेको थियो। यस्तो योगदानलाई बेवास्ता गर्दै उनलाई हटाउनु जनताको विश्वासमाथि प्रहार भएको आन्दोलनकारीहरूको ठहर छ।
संयुक्त आन्दोलन समितिका अनुसार, भोलिको विरोध प्रदर्शन काठमाडौंको खुलामञ्चबाट सुरु भई विभिन्न सरकारी कार्यालय अगाडि विरोध सभामा परिणत हुनेछ। देशका विभिन्न जिल्लाहरूबाट स्वतःस्फूर्त रूपमा काठमाडौं आउने तयारीमा रहेका नागरिकहरू, बुद्धिजीवी, विद्यार्थी, प्राविधिक क्षेत्रका विज्ञहरू तथा आम जनसमुदायको उल्लेख्य सहभागिता हुने विश्वास गरिएको छ।
“देशलाई उज्यालो बनाउने हातहरू काट्न खोजिएको छ, अब जनताले निर्णय गर्छन्,” आन्दोलन परिचालन समितिका एक सदस्यले बताए।
शान्तिपूर्ण तर दबाबमूलक प्रदर्शनमार्फत सरकारले घिसिङको बर्खास्ती फिर्ता लिने र उनलाई पुनः कार्यकारी निर्देशकमा नियुक्त गर्ने माग प्रमुख रूपमा उठाइनेछ।
सार्वजनिक सेवामा योग्य, निष्ठावान र सक्षम नेतृत्वको संरक्षण हुनुपर्छ भन्ने आवाज अहिले देशव्यापी बनिरहेको छ। यही भावना बोकेर हजारौं जनता भोलि सडकमा ओर्लने तयारीमा छन्।
