मिलन दोङ तामाङ ✍️
मलेसिया । गैरआवासीय नेपाली संघ (एनआरएनए) मलेसियाको एकताको नवौं महाधिवेशन तथा तिज विशेष कार्यक्रम ३१ अगस्ट आइतवारका दिन मलेसियाको राजधानी क्वालालम्पुरस्थित होटेल ग्रान्ड कन्टिनेन्टलमा भव्यताका साथ सम्पन्न भएको छ । कार्यक्रममा नेपाल सरकारका पूर्व अर्थमन्त्री डा.प्रकाश शरण महत, नेपाली राजदूत, राजनीतिक दलका नेता, एनआरएनएका पदाधिकारी, पत्रकार साथै ख्याति प्राप्त कलाकारहरुको उपस्थिति रहेकाले माहोल रहेको थियो।
कार्यक्रममा नेपाली कांग्रेसका नेता,पुर्व अर्थमन्त्री तथा प्रवक्ता प्रकाश शरण महतले महाधिवेशनलाई सम्बोधन गर्दै नेपाली डायस्पोराले नेपालको विकासमा महत्वपूर्ण योगदान दिएको उल्लेख गरे । उनले विदेशमा रहेका नेपालीहरूको समस्या समाधानका लागि सामूहिक पहल आवश्यक रहेको बताए ।महतले एनआरएनएको निर्वाचन सर्वोच्च अदालतको आदेशअनुसार भएको भन्दै मलेसियामा निर्वाचित कार्यसमितिलाई समर्थन जनाए। उनले सामाजिक सञ्जालमा फैलिने नकारात्मक प्रचारको प्रतिवाद गर्दै “जय नेपाल” सम्पूर्ण नेपालीको साझा नारा भएको स्पष्ट पारे।महतले दूतावासको सीमित क्षमता, श्रमिक शोषण, बीमा र सेल्टर होमको आवश्यकता, फ्री भिसा जस्ता समस्याहरूलाई संसद र सम्बन्धित मन्त्रालयमा उठाउने प्रतिबद्धता व्यक्त गरे। साथै, उनले रेमिट्यान्स नेपालको अर्थतन्त्रको मेरुदण्ड भएको र आईटी, जलविद्युत र पर्यटनले आगामी १५–२० वर्षमा ठूलो फड्को मार्ने विश्वास व्यक्त गरे।
यसैगरी मलेशियाका लागि नेपाली राजदूत डा. नेत्रप्रसाद तिमल्सिनाले एनआरएनए मलेसियाभित्र एकताको आवश्यकता औंल्याउँदै गुटबन्दी, व्यक्तिगत स्वार्थ र आर्थिक विवादमा अल्झिन नहुने बताए।उनले मलेसियामा रहेका नेपाली श्रमिकहरूको दयनीय अवस्था उजागर गर्दै मासिक करिब ४० जना श्रमिकको मृत्यु हुने तथ्याङ्क प्रस्तुत गरे। उनले श्रमिक शोषण, न्यूनतम ज्यालाभन्दा कम पारिश्रमिक, लामो कार्यघण्टा, भिसा व्यापारजस्ता समस्यालाई समाधान गर्न पारदर्शिता र सहकार्य आवश्यक रहेको बताए।
यसैगरी एनआरएनए आईसिसि अध्यक्ष महेश श्रेष्ठले आफ्नो नेतृत्वको समिति सर्वोच्च अदालत र परराष्ट्र मन्त्रालयको निर्णयअनुसार वैधानिक भएको स्पष्ट पारे। उनले वैधानिकतासम्बन्धी भ्रम चिर्दै श्रमिक अधिकार संरक्षण, लगानी प्रवर्द्धन र वैदेशिक रोजगारमा सुधारका लागि ठोस कार्ययोजना अघि सारे।श्रेष्ठले मलेसियामा रहेका कामदार हरूको शोषण अन्त्य गर्न, उचित तलब सुनिश्चित गर्न, सातामा एक दिन बिदाको व्यवस्था गराउन नेपाल र मलेसिया सरकारसँग लबिङ गर्ने घोषणा गरे ।
उनले २४ घण्टा सञ्चालन हुने एआई–आधारित कल सेन्टर स्थापना गर्ने योजना सार्वजनिक गर्दै श्रमिकको मानसिक तथा शारीरिक स्वास्थ्य समस्यामा सहयोग पुर्याउने प्रतिवद्धता जनाए । साथै, लगानी सम्मेलनमार्फत श्रमिकहरूको सानो पुँजीलाई व्यवस्थित गर्ने र जीवनयापनमा सहयोग पुर्याउने व्यवस्था मिलाउने घोषणा गरे।
यसैगरी एनआरएनए अन्तर्राष्ट्रिय समन्वय परिषद् (आईसीसी) का उपाध्यक्ष खगेन्द्र न्यौपानेले एनसिसि मलेसिया भित्र एकता अपरिहार्य रहेको उल्लेख गर्दै सबैलाई मतभेद छोडेर सामूहिक प्रयासमा जोड दिन आग्रह गरे।त्यस्तै, एनआरएनए सल्लाहकार ,अभियन्ता तथा माओवादी केन्द्र एसिया प्रदेश अध्यक्ष शनि कुमार ओलीले अदालतको फैसला स्वीकार्दै महेश श्रेष्ठ नेतृत्वको समितिलाई वैधानिक मानेर सबैलाई एक जुट हुन आह्वान गरे।
महाधिवेशनमार्फत २०२५–०२७ कार्यकालका लागि इन्द्र नारायण लिम्बु एनआरएनए मलेसियाको अध्यक्षमा निर्विरोध निर्वाचित भएका छन । अध्यक्षमा निर्वाचित भएपछि लिम्बुले आफुले मलेसियामा रहेका नेपालीको हकहितमा काम गर्ने बताए । उनले नेपाली दूतावास र मलेसियामा रहेका अरु संघ संस्थाहरु संग सहकार्य गरेर अगाडि बढ्ने बताए ।कार्यक्रममा कलाकार शोभा त्रिपाठी तथा बुद्ध लामा लगाएत स्थानीय कलाकारहरुले समेत बेजोड प्रस्तुति दिएका थिए ।
निर्वाचन समितिका प्रमुख निर्वाचन आयुक्त विष्णु प्रसाद पौडेलले सबै पदमा एकल तथा निर्विरोध निर्वाचित उम्मेदवारी परेकाले सम्पूर्ण पदाधिकारी तथा कार्यसमिति सदस्यहर लाई सफत ग्रहण गराए।निर्वाचन समितिले एक विज्ञप्ति जारी गर्दै सम्पूर्ण निर्विरोध निर्वाचित पदाधिकारी तथा सदस्यहरूलाई बधाई ज्ञापन गरेको छ। साथै, उनीहरूको कार्यकाल सफल रहोस् भन्ने शुभकामना पनि व्यक्त गरिएको छ।
नवौं अधिवेशन बाट नवा निर्वाचित कार्यसमितिको नामावालीः
अध्यक्षः इन्द्र नारायण लिम्बु
वरिष्ठ उपाध्यक्ष: दिल कुमार केरुङ
उपाध्यक्ष:श्रद्धा देवान, बालधोज लिम्बु, टिकाराम अधिकारी, बिष्णु चौधरी, बिनोद कुमार यादव र बिमल कुमार राना
महिला उपाध्यक्ष: शान्ति थापा
युवा संयोजक: मातृका खतिवडा
महिला संयोजक: इन्दु बस्नेत
महासचिव: प्रमोद शर्मा
सचिव: सविन कुमार लोप्चन,रामकृष्ण कार्की
सह–सचिव: विकेन्द्र लिम्बु मादेन
कोषाध्यक्ष: सन्तोष केसी
सह–कोषाध्यक्ष:राम खड्का
कार्यसमिति सदस्यहरूमा क्रमशः
बिशाल नेगी, राम बहादुर गुरुङ, अर्जुनबहादुर कार्की, सुमन कार्की, जयराम तिमील्सिना, भेख बहादुर घिमिरे, इश्वरकुमार आले मगर, प्रकाश गिरि, सायम्पा घले, प्रमोद कुमार महत्तो, जय प्रकास साह, डिल्ली न्यौपाने, सेर बहादुर गुरुङ, सन्जिप लिम्बु, दिपक थापा, राजेन्द्र लिङ्देन, रामबहादुर चन्द, राजेन्द्र घिमिरे, सन्तोष अधिकारी, शिब शंकर साह, मणी कुमार थापा, सुरज श्रेष्ठ, जितेन्द्रकुमार साह, शिव थापा, राजु श्रेष्ठ, पासाङ लामा, भोजकुमारी सुबेदी, कृष्णबहादुर खत्री
