काभ्रेमा मतदाता कति ? (विवरण सहित)

धुलिखेल— निर्वाचन आयोगले फागुन २१ गते हुने निर्वाचनका लागि १८ वर्ष उमेर पूरा भएका मतदाताको अन्तिम नामावली सार्वजनिक गरेको छ। जस अनुसार जिल्ला निर्वाचन अधिकारी दिनेश शिवाकोटीका अनुसार काभ्रेपलाञ्चोकमा कुल ३ लाख २६ हजार ६ सय ११ मतदाता छन् ।

तीमध्ये पुरुष १ लाख ६७ हजार ४ सय ९९, महिला १ लाख ५९ हजार १ सय १० र अन्य २ जना छन्। २०७९ को निर्वाचनको तुलनामा जिल्लामा १६ हजार ५ सय ४८ मतदाता थपिएका छन्।

काभ्रेमा दुई निर्वाचन क्षेत्र छन् । निर्वाचन क्षेत्र नम्बर १ मा १ लाख ६१ हजार १ सय मतदाता (पुरुष ८३ हजार ७ सय ७३, महिला ७७ हजार ३ सय २६, अन्य १) छन्। यस क्षेत्रमा खानीखोला, चौरीदेउराली, तेमाल, नमोबुद्ध, महाभारत, रोशी, धुलिखेल–८ देखि १२, पनौती–४ देखि १० र बेथान्चोक–६ पर्छन्।
निर्वाचन क्षेत्र नम्बर २ मा १ लाख ६५ हजार ५ सय ११ मतदाता (पुरुष ८३ हजार ७ सय २६, महिला ८१ हजार ७ सय ८४, अन्य १) छन्। यस क्षेत्रमा धुलिखेल–१ देखि ७, पनौती–१,२,३,११,१२, पाँचखाल, बनेपा, भुम्लु, मण्डनदेउपुर र बेथान्चोक–१ देखि ५ पर्छन्।

मतदानका लागि जिल्लाभर १ सय ८९ मतदान स्थलमा ४ सय मतदान केन्द्र तोकिएका छन्। १३ पालिकामा १ सय ३५ वडा छन्। मतदान केन्द्रमध्ये ५८ जटिल, ७६ मध्यम र ५६ सामान्य छन्। राजनीतिक दलहरूले सुरक्षा र निर्वाचन वातावरणबारे चासो व्यक्त गरे पनि सरोकारवालाले मुलुक निर्वाचनतर्फ अघि बढिरहेको बताएका छन्।