रोशीमा निर्माणाधिन डम्फूमा चरी नराखेपछि पूर्व वडा अध्यक्ष तामाङको चिन्ता

रोशी– काभ्रे जिल्लाको रोशी गाउँपालिका वडा नं. ११, कालोढुंगामा निर्माणाधिन अवस्थामा रहेको डम्फू जिवन्त संग्रहालयमा निर्माण भएको डम्फूमा चरी नराखेपछि पूर्व वडा अध्यक्ष मिलनकुमार तामाङले चिन्ता व्यक्त गरेका छन् । सामाजिक सञ्जाल फेसबुकमा उनले चिन्ता मात्र व्यक्त गरेका छैनन्, गाउँपालिकालाई जवावदेही बन्न अनुरोध समेत गरेका छन् ।

तत्कालीन गाउँपालिका अध्यक्ष डिबी लामा र ११ नं. वडा अध्यक्ष तामाङको योजना र पहलमा सो संग्रहालयको काम अघि बढेको थियो । विशेष गरि तामाङ समुदायका ऐतिहासिक तथा साँस्कृतिक बाजाको रुपमा परिचित डम्फूले एकातिर इतिहास जिवित रहने र अर्को तिर पर्यटन विकासमा टेवा पुग्ने देखेर यो संग्रहालयको परिकल्पना गरेका थिए ।

हाल निर्माणाधिन अवस्थामा रहेको डम्फूमा चरी नराखेपछि डम्फूको आकृतिले जे अर्थ पनि लगाउन सकिने भन्दै तामाङले चिन्ता व्यक्त गरेका छन् ।

उनले खिचेको फोटो र भिडियो समेत फेसबुकमा पोष्ट गर्दै तामाङले जानीजानी नियतवस चरी छुटाएको उनको दावी छ ।

‘पहिलो चरणको ठेक्कामा यो चरी छुटिएको मेरो बुझाई हो थियो । तर लगातार थप दुई चरणको ठेक्कामा छुटिएको जानाजान नियतवश हो जस्तो लाग्छ । चरी बिना यो आकृतिलाई जे अर्थ पनि वा अरु नै अर्थ पनि लगाउन सकिन्छ । पछिल्लो घटना क्रमले झन संशय थपिएको छ ।’ तामाङले लेखेका छन्, ‘रोशि गाउँपालिका सम्बन्धित निकायलाई तत्काल यो बिषयलाई किन, कसरी ? के कारणवश यो हुँदैछ जवाफदेहिता हुन सक्नु पर्‍यो । तत्काल यो थप काम यहि आर्थिक बर्ष सँगै सकिने गरि गराउनु हुन अनुरोध गर्दछु ।’