नमोबुद्ध । काभ्रे जिल्लाको नमोबुद्ध नगरपालिका प्रमुख टीपी शर्माको नेतृत्वमा बृक्षारोपण भएको भएको छ । बुधबार विश्व वातावरण दिवसको उपलक्ष्यमा नगर प्रमुख शर्माको नेतृत्वमा बृक्षारोपण गरिएको हो । जुन ५ तारिखका दिनलाई विश्वमै विश्व वातावरण दिवसको रुपमा मनाईदै आएको छ ।
वृक्षारोपण कार्यक्रममा प्रमुख शर्माका साथै उपप्रमुख रामदेवी तामाङ, नगरका जनप्रतिनिधिहरु, महिला स्वास्थ्य स्वयमसेविका, जनता र कर्मचारीहरुको समेत सहभागीता रहेका थिए ।
बृक्षारोपण पछि नगर प्रमुख शर्माले सिंगो नगरपालिकालाई नै हरित नगर बनाउने लक्ष राखेको नगरपालिकाले वातावरणीय संरक्षणको आवश्यकता रहेको बताए । साथै वातावरण जोगाउने उद्देश्यका साथ यस्तो कार्यक्रम आयोजना गरिएको नगर प्रमुख शर्माले बताए । ‘यस्ता कार्यक्रमलाई वातावरण दिवसमा मात्रै सिमित नराखी योजनाबद्ध रुपमा ठोस गतिविधिका साथ अघि बढाउने सोचमा छु ।’ प्रमुख शर्माले भने ।
गत वर्ष काठमाण्डौं सिंहदरबार परिसरमा प्रधानमन्त्री केपी शर्मा ओलीले ‘एक नेपाली एक फलफूलको विरुवा रोपण अभियान’को विश्व वातावरण दिवस शुभारम्भ गरेका थिए ।
सन् १९७२ को ५ जुनदेखि १६ जुनसम्म संयुक्त राष्ट्रसङ्घको महासभाले विश्व वातावरण सम्मेलनको आयोजना गरेको एक वर्षपछि वातावरणीय संरक्षणको आवश्यकता महसुुस गरी ५ जुन १९७३ मा पहिलो पटक विश्वका विभिन्न मुलुकमा विश्व वातावरण दिवस मनाउन सुरु गरिएको थियो ।
