नमोबुद्ध । काभ्रे जिल्लाको नमोबुद्ध नगरपालिकामा महिलाहरूलाई स्कुटर चलाउने तालिम सुरु भएको छ । सोमबारदेखि सुरु भएको तालिमको नगरप्रमुख टिपी शर्मा तिमल्सिनाले उद्घाटन गरेका छन् ।
कार्यक्रमको उद्घाटन गर्दै नगर प्रमुख तिमल्सिनाले स्कुटर सिकेपछि लाइसेन्स प्राप्त गर्ने महिलाका लागि गाडी चलाउन सिकाउने प्रतिबद्धता जनाए । महिला सशक्तीकरणमा नमोबुद्ध नगरपालिका अग्रस्थानमा रहेको भन्दै उनले ११ वटा वडामै सचेतनामूलक कार्यक्रम सम्पन्न गरिएको जानकारी दिए । नगरपालिकाले महिलाका लागि लक्षित गर्दै सीपमूलक तालिम, लोकसेवा तयारी कक्षाहरू सञ्चालन गरेको जानकारी दिँदै उनले महिलालाई उद्यमी र आत्मनिर्भर बनाउन नगरपालिका क्रियाशील रहेको बताए ।
कार्यक्रममा नगरपालिका उपप्रमुख रामदेवी तामाङले विगतमा पूर्वाधार निर्माणको काम अघि बढाइएकोमा अब सीप विकासमा नगरपालिकाले जोड दिएको बताइन् । नगरपालिकामा जनप्रतिनिधि निर्वाचित भएपछि प्रत्येक वर्ष महिला सशक्तीकरणको क्षेत्रमा बजेट वृद्धि गर्दै लगिएको उनको भनाई थियो । कार्यक्रममा नगरपालिकाका प्रमुख प्रशासकीय अधिकृत राजन पौडेलले महिला घरबाहिर महिलाको जति बढी संलग्नता हुन्छ त्यति धेरै क्षमताको विकास हुने बताए । सीप विकाससँगै महिलामाथि हुँदै आएको हेपाइमा कमी आउने पौडेलले बताए । नगरपालिकाले महिला सशक्तीकरणमा विशेष जोड दिएको र आगामी दिनमा यसलाई थप प्रभावकारी बनाउँदै लैजाने उनले बताए ।
तालिममा नगरपालिकाका महिला जनप्रतिनिधि र महिला संस्थाका प्रतिनिधिसहित ४२ जनाको सहभागिता रहेको छ । तालिम यही चैत १६ गतेसम्म सञ्चालन हुने नमोबुद्ध नगरपालिका महिला तथा बालबालिका शाखा प्रमुख तारादेवी सुनुवारले जानकारी दिइन् ।

Comments

comments